1 Samuel 8
1 撒母耳年老个時，立厥孻仔做以色列个士師。
2 大个孻仔安到約珥，細个孻仔安到亞比亞；佢等在別是巴做士師。
3 佢等毋學阿爸个模範，反轉貪愛錢財，被人收買，毋照公道斷是非。
4 所以，以色列所有个長老全部聚集到拉瑪去見撒母耳，
5 對佢講：「你看，你恁老了，你个孻仔又毋學你个模範。所以，請為𠊎等立一個王，像其他國家共樣，有王來治理𠊎等。」
6 撒母耳當無歡喜佢等要求立王个事，所以佢去求問上主。
7 上主對撒母耳講：「做你順人民个意思！佢等並毋係㧒掉你，係㧒掉𠊎，無愛𠊎做佢等个王。
8 自從𠊎𢱋佢等出埃及以來，佢等就離開𠊎，去拜別个神明。這下佢等對你所做个，就係佢等一直對𠊎所做个。
9 做你順佢等！總係你愛嚴嚴警告佢等，㧯佢等講清楚，將來佢等个王會樣般對待佢等。」
10 撒母耳將上主个話全部㧯該兜來向佢要求立王个人民講。
11 佢講：「你等个王會恁樣對待你等：佢會喊你等个孻仔做兵，有兜做戰車兵，有兜做騎兵，有兜做先鋒隊員。
12 佢會設立人做官長，有兜帶兵一千儕，有兜帶兵五十儕。你等个孻仔會代佢耕田，代佢收割，代佢製造武器㧯戰車个裝備。
13 佢會喊你等个妹仔為佢做香料、煮食、焙餅。
14 佢會將你等最好个田地、葡萄園、橄欖園賜給佢个官員。
15 佢會將你等个五榖㧯葡萄个十分之一賜給佢个宮廷大臣㧯其他官員。
16 佢會將你等个僕人、使女、最好个頭牲㧯驢帶走，喊佢等代佢做工。
17 佢會拿走你等羊群个十分之一，你等自家也會做佢个奴才。
18 到該時，你等會為到自家所要求个王哀求上主，總係上主毋會搭你等。」
19 人民毋聽撒母耳个話，反轉應講：「毋使你管！𠊎等一定愛有王治理𠊎等！
20 恁樣𠊎等正會像別國个人民有自家个王治理𠊎等，帶領𠊎等上戰場相㓾。」
21 撒母耳聽到佢等个話就照恁樣向上主講。
22 上主對撒母耳講：「照佢等所要求个，為佢等立一個王！」所以撒母耳對所有个以色列人講：「逐儕轉自家个城去！」